ملتقى خطوة خطوة
شعر
………………………………………
الشعر تِفل الذاكرة
مركِّد بكعب الروحْ:
تقيل
وقليل
وطعمتو مُرَّة
بقلبو في ريحة هالْ
صارت عَ أخر روحْ
صُبِّي
قبل ما تروح بالمرَّة
***
هَيدا الصَبي
……………………………………..
هَيدا الصَبي جهلانْ
والشَيطنِة بدمُّو
أزعَر….
والمسبَاتْ
خلقتْ على تمُّو
أنجأ يفكّ الخطْ
وبيغلَط بإسمو
ومنشان يكتب شعرْ
بيسرق حكي أمُّو
***
غربال
………………….
عَ البَالْ
عَمّ يمرُق حَدَا عَ البَالْ
يسلِّم علينا ومِن قَبل مَا يفلْ
يِسأل سُؤال:
هَـ الذاكرَة كَانِت مَرَا ورجَّالْ
شو صَار ت َصَارِتْ مَرَا عَ الحِلّ؟
…..
غربَالْ
في عندو الوَقت غرباَلْ
خصُوصِي اذا بيملْ
بيهزّ غربالو يَمِين شمَالْ
بتصير هيِّي تكتَر بهل بَالْ
وهوِّي بيصيرِ يْقلْ
***
غناني النعس
………………………
صار الولد نعسانْ
غنُّوا إلو حكايِة
غْنَانِي النَعَسْ بتقول
بُكرَا الفرحْ جاييْ
فِكْرِ الولدْ مشغولْ
يمكن عَ حلوايِة
قعدتْ بعين الشمس
وضاعتْ بالحكايِة
فتّشتْ ألف كتابْ
آيِة ورا آيِة
تاري بْحرفْ مجهول
إنتي مخبَّايِة
……..
نام الولد عَ السكتْ
تَ يحلم بجنِّة
وكَحَّلْ جفون الوقتْ
أخضر على بنِّي
صار الشجر فرحانْ
واقف عم يغنِّي
والأرضْ عم بتدورْ
والناس ويننِّي؟
فاق الولدْ بكِّير
وقامْ وسألْ عنِّي
وملَّسْ عَ شعري وراحْ
شو عَرَّفو إنِّي
مبارح أنا وعمْ نام
منامي وَقَعْ منِّي؟!
***
اعتراف
………………….
كَانُوا البَشَر متل الشجرْ
واقفين بالغاباتْ
لا ريح بتجبْلُن خبرْ
ولا عندُن حكاياتْ
لا بيسمعوا ضربة حجر
ولا بيقشعوا مناماتْ
وحدن ….
على كتر الضجرْ
بتفكرُنْ أموات…..
…..
– شو عملت تَ صاروا بَشَرْ؟
– طعّمتُنْ مسبَّاتْ….
***
وزن
………………
الشعر ما عندو وزن
غير الحزن
هيك الفرح قلّيْ…
وطَلَّعِ بِحالو وقالْ:
لكْ …. يِقطعِ القلهْ
***
كتوب القصيده
……………………………….
كتوبِ القصيدِه
وكبّها
مَا تحبّها
خلّي الكلامِ بِعبّها
وشيلْ وجَّكْ من جحيم خيالها
ولمَّا تسبَّك ……
سبّها
وكمِّل طريقَكْ
ما تضل قبالها
كرمالها
تَ تصير تعرف تتكِل عَ حالها
وما تتكِل عَ ربّها
***
نَحت
…………………
هَيدِي مَرَا من ترَابْ
عَمْ تنحَتْ عتمْ
ورجَال سُمر
بيُولَعوا متلِ الفَحمْ
جَمرَة وجَمرَة بتحرقُن
بتعرقن
تَ تشيل آخر آه من آخر حِلمْ
ولمَّا الوَقت
يفلُش رمادو عَ التخت:
بتمد إيدا عَ مَجَامِر بَاَلهَا
بتطفِي أسَامِي رجَالهَا
وبتنامْ ….. هِيِّي وحَالهَا
***
جُوع عّتيق
……………………
الشَمس صَاج الصبحْ
وفي شَخص قَاعِد فَوق
عَمّ يخبُز قمَارْ
حتَّى بحيَاتو مَا يجُوع الليلْ
ويقُوم يَاكُل بالغَلَط شي نهارْ
***
طَرَب
…………………
لَمَّا القَتِيل تفركَش بعمرُو الطَوِيلْ
وقال: آهْ
وضحكِة القَاتِل وَرَاهْ
مِن كِتِر مَ بَيَّن حلُو صَوت القَتِيلْ
صَاح القَبر: اللهْ
***
واحَد شهيد
……………………….
كل ما طلِع عَ بالنا (وَاحد شَهِيد)
منقول: الله يرحمو… والمَوت عِز
و (هُوِّي) مَا عَباَلُو حَدَا… وَاقِف بعيد
عَم ينفُخ بسيجَارتو ويقول: (طززز)
***
أسَامِي
………………
بالأصل
ماَ فِي ناس إسمُن ناس
بالأصل
كل الناس إسمُن: (أهلْ)
والمَوت.. كيف مَ كان شكل المَوتْ
إسمُو: (جَريمة قَتلْ)
والضحك مَا إسمُو ضحك
إسمو: (بِكِي عَ مَهلْ)
وبالعَين
دمع العَين إسمو: (كِحِلْ)
وبالسَهِل
ما في حدا إسمو الصَدَى
إسم الصَدَى بالسَهل: (صَوت السَهلْ)
ومِين قَال إنُّو الحُب إسمُو حُب؟
إسمُو: (مَشِي ع َالَحبلْ)
***
أصل الحكايِة
…………………………………
أصل الحكايِة: مَرَا
وأصل الشعر: رِجَّالْ
( محتالْ..
وزعوري ومش مربَّى)
ضحكِت إلُو … حَبَّا
ولمَّا قالتلو:
الضحك آخرتو بكي
تخبَّى..
وصَارْ يِضحَكِ بْعُبَّا
***
بخُّور
……………
وجِّكْ..
عَلَّق شجرْ أخضرْ عَلَى بَوابي..
صرِت غَابِة
من كتر مَ وقدتي جمر ب البال
بخُّور صَارِت رِيحة تيَابِي
***
سَمِّي يا إمِّي
…………………………….
سَمِّي
يا
إمِّي
واندبي الحظ القليلْ
إبنك لِفِي من المعركة قاتل/ قتيلْ
إبنك مَلَك
سَيفو تَنَك
حصانو بحياتو ما تعرَّف عَ الصهيلْ
بيُّو قبل ما يموتْ
ورّتو تابوتْ..
***
مزاج
……………….
شَمس السَمَا بالأصل مُش عَين السَمَا
شَمس السَمَا بالكَاد….
تطلِيعَةْ
وعَتمِ السَمَا مَنُّو عَمَى
مَرَّات
بتحِب السَمَا
تشوف الدِنِي من بَين صَابِيعَا
***
مَرَا مِن مَيْ
……………………………….
وَحدُو الشِعِر
عندُو مَرَا مِن مَيْ
حلوِة
مخبَّى تَحِت فُسّتّانَا
النَبع لِ
بيجعَلْ كِلْ مَيت حَيْ
***
تربية
……………..
حِكّيِت مَعِي هَـ الأرض مرَّة ب الومَا
وسبِّت وقالت: شد إجريك…العمَا
إبني إنت.. شو باك خَايف يا صَبي؟!
مَعقُول إبني يخاَف من شَقفِة سَمَا ؟
***
مَوتِة فّقِير
………………..
تَابُوتهُن غَالِي
وكل مَ خَطَر مَوتُن عَلَى بَالِي
بفكِّر بِ نَاس كتير عَم يبكُوا
وعَجقِة صلَا
وصْوَات عَ العَالِي
….
بزهق
بقعُد خَانِق خيَالِي
وبحس حَابب مُوت لَ حَالي
…………………..
بيبقَى عَ بالي كتير إشيا طالعَه بذات الوقت
متل الحكي بعز السكتْ
متل الشمس
جايي ع بالا الفَيْ
متل ل بيموت مفتِّح عيونو شويْ
متل الفَرَحْ
لمَّا انجرَحْ
تعلَّمْ دروس الحزن كَرْجة مَيْ
***
وعد
…………………..
قلِّي المَشي:
ما تغشْ حالَك يا رفيقْ
ولّع اللغّة منيح وحروق الطريقْ
انبقْيِتِ الدَعسِه معلّمِه بعد الحريقْ
بينزَلْ عليك الشعر من فج وعميقْ
***
طلوع الضوْ
………………………………
وجِّك
طلوع الضوْ
كانت عم تشتِّي الدني
وفجأة بيروق الجوْ
وجِّك
– إذا ضحكتِي –
بيقول الضحك: نيَّالي ….
ضلِّي ضحَكِي عَ طول كرمالي
***
ضبّوا الحكّي
………………………………….
ضبّوا الحكّي ما في حدا مهتمْ
كلّ الحكي بالأصل غيمة صيفْ
الشعر عمرو ما انتصرْ ع الدمْ
والدمْ عمرو ما انتصر عالسيفْ
***
قصيدة البيت
………………….
بالبَيتْ
أوضَة مسكَّرَة/ عَ العتم والحيطانْ
وعَ الحيطْ
صُورَة معلَّقَة/ بتلبَق لَ مِين مَ كانْ
وبالسَقِفْ
مروحة الزَهَق/ عَم تشحَط الدبَّانْ
وعَ التَخت
مش نايم حَدَا/ بس التَخت نعسانْ
والبنتْ
عَمِ تْحَكِّي الصَبي/ تَ يبطِّل الدخَّانْ
…
والأرضْ
عَم بتدورْ
والوَقتْ
مش مجبورْ/ يخبِّر حَدا وَين كانْ
___________________________________________________
- هشام أبو خزام
